اريد اعلن حدادي وللعشك ماعود


واريد انساك وانسى البينك وبيني

واشك دفتر غرامك خاطر انه انساك
ودير الوجه عنك من تلاكيني
ماريدك بعد لو انت روحي تصير
وماريدك لون من الموت تحييني
ملح بعيوني احطن وانسى حتى النوم
اخافن بالمنام طيوفك تجيني
اذا شافتك عيني وفرحت بملكاك
والله اتبرى منها وهاي مو عيني
واذا صافحك جفي بحجة الخملان
اكص اثنين اديه يساري ويميني
واذا كالولي حبك يسري بالشريان
ثق بالله اكطع كل شراييني
واذا صاير شمس انه ابقى دوم بليل
وماريد الضوه وبالظلمة خليني
تذكر من لكيتك والعطش واليك
وكلتلي يمعود اترجاك ترويني
عصرت جفون عيني ووشليت دموع
وشربتك بديه وانت تدريني
ومن مرني العطش وانت جربة ماي
كصدتك معتني ومديت جفيني
وانت بكل وكاحة وكل صلافة عين
درت بجفوفي سم وردت تنهيني
تذب نفطك عليه وانه بيه النار
وتتحمه على ناري وماتطفيني
وصرت محبس بديك وكمت بيه تسوم
ساعة تبيع بيه وساعة تشريني
اظل خصمك وافضحك حتى من تموت



على كبرك اخطن بايك سنيني