تريد انســــــــــــــــــــــــــاك ::_

تريد أنساك

تريد أنساك .. شلون أنساك ويضمك خاطري سكتة

وتريد أنساك وتجمعك آه ويا صيحة آخ بالونة

ويالعنَة التشب ابصوتي من غنة

وتريد أنساك ؟؟

جمر شمات بسمار ويدك بكلبي دكات

وتريد أنساك .. وك أتمنة

يا جرح إعلى أيدي ولا أظنه الطاب

ولا عاف الأثر وخفت من ظنه

موهينة وتريد أنساك ...

واشمال الشبج وياك... وماظن بالشبج تنصاد

ويافقر الماي من السمج عافنة

وتريد أنساك؟

ماكلك تعال وعاين إعلى الحال .. ولا طاري وأمر فد يوم إعلى البال

خافن أجرحك حيل وأبعده الجرح عنك ماريده يتدنه

وتريد أنساك؟

ياسبع سنين جنهن سبع ساعات مرَن .. التلوح كبالي من جنة

آنه وياك سوية نغيب والحاضر يشوف أجسام بس التظل

بالكعدة مواحنه ..

وما يدرون بينه نروح .. نسافر ونطر لبعيد ..

قلبين وشربها العشك وإتهنه ..

وتريد أنساك؟

ومافد يوم اليمر ونسيت ولا يوم اليمر لا تظنه

وك آنه الجبت كل بحور

وك آنه الطفت فوك الدور

وك آنه الألم بحشاي .. عالدنيا التوذرنه

تطش جكليت هالعذال .. فاركتك حبيب الروح

ويحل فراك محل أفراح .. والاسود لونه بالأبيض

يوسمنَه ..

عجيبة من تريد الناس كلها أنساك وتذب كلمات وخناجر نص الحجايات

( راح ونسى وعافك وياهو اليجيبه ومنو يرجعنه )

والاعجب ويمكن مامشت وياك..

صار العاذله تنهض تنادي تصيح

صار هواي وقفلنه حساب ..

لا تحسبه أنته ولا نحسبنه

وتريد أنساك ؟؟

وأجيت اليوم ...وبهالسهوله انساك؟!

آنه أنسه بس تعرف شوكت وشلون ..

من يعاف الماي أرض دجله ويجف منه

من تصرخ صخبها الكاع ..

ومن تلكى ميت ما تدفنه أهله ..

آنه أنساك يوم اتشوف كل هالناس مرتاحة ومزيونه وتتسله

من تسلاني هاي الروح وتريد تروح رح تسمعها تتهنه

بس قبل متروح مني انفاس راح تكول

فاركتك انا بس ماكدرت أنساه ..

ترة النسيان شغلة حيل مو سهله

ترة النسيان شغلة حيل مو سهله

بقلمي المتواضع