أحلى ومضات شعرية وابوذيات حيل حلوة

احلى ابوذيات أومضات للعشاق والضايجين
شوفوهة وانتظر ردودكم**
تحااااتي للغالين والاعزاز

العمر ياصاح من هجرك تمرمر
بدليلي سهام شماتي تمرمر للشاعر رائد ابو فتيان
أنشدك هم كبل ضايك تمر مر
التمر مر بغيابك مر عليه

ماظل كل عظم صاحي دهدهن
تجرجر بالمصايب شو دهدهن
ولك دمعات البعينك دهدهن
عليمن حابس دموعك خطيه

غيابك خلل اعضامي وهدهن
وجر حسرات ببعادك وهدهن
الي دمعات لو أبجي وهدهن
تفيض اليابسه ونغرك سويه

مثل ماي شيكضك وانت جاري
وبس ماشي اليودك وانت جاري
تعذبني بمحبتك وانت جاري
واظن رب العرش وصاك بيه

وحق أية تبارك وأنتنازل
وحق مصة أشفافك أنت نازل
اذا بغداد دارك وانت نازل
أسويلك سحر وترد اليه

حزن دنياي تمطر ماصحتلي
وردت فرصه اشوفك ماصحتلي
وكفت اكبال عينك ماصحتلي
صحتلك مادرت وجهك عليه

سوالف راحن ابالي وجن حين
وحيل اتسودن بحبك وجن حين
كلب طير ارتجي من الله وجن حين
اطيرن ليك بيهن كل مسيه

رفعت اعلام حبنه فالسرايه
وهزمت جيوش خوفي فالسرايه
قره القرأن كلبي فسر أيه
ولكاك تجوز دنيه ودين بيه

ينادر تكتل بطبعك وندراك
ويمته الطيبتك نوصل وندراك
أخو للكلفه اعرفنك وندراك
ذخر للدنيه من اتميل بيه

هواء انت بغيابك قل هوه الله
أحبك كلمه حلوه قله والله
اذا لم تقل أقرا قل هوه الله
مع الحمد لكي انهي القضيه

حرت ين الاتاني ماتاني
ومو ميه الشماته ماتاني
اتاني والاريده ماتاني
اجه المارايده وغف عليه

رمش عيني اعله دربك شفته كالناس
وانه بلا ناس شفتك شفته كالناس
احذر لون است شفتك الناس
اليموت بركبتك تبقه الخطيه

دمع وحزان حبك هيج أذاني
والك مجبور اكضلك هيج أذاني
تدري انه من اصلي هيج أذاني
أشهد ان حبك مو بديه

عجب تنكر اطلبك وانه دينك
تعال اوكف اكبالي وانه دينك
اذا حبي اللهاك وانه دينك
تشرك بس تح واحد عليه

أصيله الروح تنشد من خيالي
وافز مرات اخافن من خيالي
شكثر حاولت احذفك من خيالي
خيالي انحذف وانت الهسه بيه

ماشفتك لجن ذني كفن بيك
رسم بالنحت الوجهك كفن بيك
بياضك هذا لو كلي كفن بيك
أحس اثنينهن تاهن عليه

نحب شخصك اذا مريت ونجل
وعلينه شهود الك توراة ونجل
جذب ماون عليك الكلب ونجل
وتيتم جيل من فركاك اليه

عضامي من برود البيك صليت
وعلى راسي نار الغطه صليت
درت وجهك عليه وكمت صليت
يحسنك تيهه القبله عليه

(الومضات)

حاولت أرسمله صوره بكل مكان

وبيدي هاي انه ارسمت هل الصوره
يضحك بوجه اليشوفه ومن اجيه
يهز اديه وعني وجهه يدوره

خاويت النفس جي ماحمل اه
وماون وفضحني ويه المأسي
كبل صاحبت راسي كلت ارتاح
طلع راسي جذب نايم براسي

عفتك للشمس حتى اسمر تصير
وعيون العواذل تكطع النظره
رديت ارد اشوفك من وصلت الكيت
وجهك ماتغير والشمس سمره

أدك باب كلبك صارلي هواي
تطلع شوفه ياهو شوفه شيريد
اذا ابقه ادكن أكسر الباب
وعليك انه اطب اتريد متريد

كمت اغار هواي من عندي عليك
واي جزء بيه عليك يعاني
ولأن يحجي هواي وياك اللسان
كمت اسولفلك بدون الساني

شيجيبك يباجر والتقي وياك
وشيلنك كلب مابين الضلوع
واذا باجر اجه وماجابك وياه
اكض باجر وشيلنه من الاسبوع

شفناك وسكرنه بهاي شتكول
على هذا الامر نتحاسب هناك
الله يساعد الصيام عالصوم
مفاطير وفطرنه بيوم شفناك

باجرمن تجي مو من وره الباب
وشكلك هم تجي وتحسبه جيه
اريدك من تجي تلزك على الباب
والاثوب لو تجي وتلزك عليه

عليك الكل ثابت قفل مقفول
اموت وما ادور عن بديلك
ماحب الصلاه بس كمت صليت
أصلي الخاطرك حتى اندعيلك

كوم صلي وأذكر الله بالصلاة
بلكت يلتفتلك لو كمت ربك
الله شيلتفت وأنت العصر مريت
خليت الضحايه مجطله بدربك

احنه مانطلب بعد منك تعود
وابد مانطلب بعد منك تحن
رايدين اترد كلبنه المات بيك
حتى يمنه احنه بكرامه يندفن

صاير يوديك ويجيبك كلام
تريد تخسرلك وفي ماين اديك
احنه مابيناتنه بس السلام
انه حاجي وياك حتى احجي عليك

لايجي كولوله ماظل يهه حيل
خلصن دموعي وبجيت اسنيني
جان يطلب وانه اكله بعيني هاي
بيعني هاي وحط اصبعه بعيني

عمر انه انتظرتك ليش ماجيت
جا يمته تجي وتشوف حالي
لحظه من الوكت ماكدر انساك
ردت انساك شو جيت اعله بالي

انه لو كتلك اجي معناهه اجيك
وانت مامره كلتلي وجيتني
مره اذكر بالحلم كتلي تعال
واركض بنص الحلم خليتني

جمالك مو جمال مخبل الناس
وبس قاسو جمالك وي نبي يوسف
من شافك صفن ظل دايخ ومحتار
وظل يوسف يسولف وي نبي يوسف

اذا شمسين تطلع كارثه تصير
جمالك كلي هذا منين جبيته
اتفق ويه الشمس لدوخ الناس
لو تطلع شمس لو تطلع انته

انت يل حسنك خيال من الخيال
وصعب ان توصل جمالك صوره
ردت ارسمك صوره في روعه جمال
وانه ارسمك طاحت الصبوره

يفر بينه الوكت فرت نواعير
ورغم اجفاك بس ظلينه ننطر
صبر ايوب يمكن مو صبر جان
ولو مر بصبرنه بلحظه يكفر

أخذ ليلك بعد من ليلي يفلان
مامحتاجك تزيد ظلامه
تعت الكرامه بعشرتي وياك
تجي وتروح ماظلت كرامه
مع كل التحيات والامنيات العطرة لكل اعضاء ومشرفوا المنتدى

تسلم ع الاشعار
ما ننحرم من جديدك يا غالي

شكرا حبيبي الغالي على الاشعار الجميله والابوذيات الرااااااائعه

لا تحرمنا ابداعاتك ننتظر جديدك بشوق

لك تحيتي ياورد

كل الشكر والتقدير للجميلة والغالية الصديقة دنو شخبارج يالغالية مشتاقين
وايضا ً شكراً للاخ مساري العراقي حياك الله
تحياااااااااااااااتي حبايبي

يسلمووو على الكلمات المميزه

ويسلموو على الطرح المميز منور المنتدى بمواضيعك العسل