أكبر قهر لا جيت تعشق لك إنسان

أكبر قهر لا جيت تعشقلـك انسـان
واللي تحبه ساهـي ٍ مـا درى بـك

وأكبر قهر تحلم وتحلم لـك ازمـان
ويطيح حلمـك ميـت ٍ عنـد بابـك

وأكبر قهر تبني من سنيـن بنيـان
وتشوف بنٌيـك مـا تعـدى ترابـك

وأكبر قهر تسقي من الورد بستـان
وتموت بين يديـك زهـرة شبابـك

وأكبر قهر تارد على البير ضميـان
وتشوف بعض الطين حايس شرابـك

وأكبر قهر لاحطـوا النـاس نيشـان
كل ٍ يزٌهـب وانـت ضايـع زهابـك

وأكبر قهر ترهي على حصان خسران
يوم السبق لا طحت كل ٍ حكـى بـك

وأكبر قهر لاصرت ضايع وعطشـان
ونفس الطريق اللي يوديـك جابـك

وأكبر قهر صاحبك لا جـاك خـوٌان
لابحت له بالسـر راح ووشـى بـك

وأكبر قهر تعطـي وتعطـي علشـان
تاخذ عقـب كـل العطايـا حسابـك

كل ما سبق ذكره على الشوف ماكان
حفنة حروف ٍ مـع بعضهـا تشابـك

ماهوب هرج ٍ يِعجَـنْ بفـم وللسـان
ولاهوب عود ٍ يكسـره حـد نابـك

إن كنت فيما قلـت تحتـاج برهـان
ناظر وتلقى فـي قصيـدي جوابـك !!

وإن كنت فيما قلت مخطي وغلطـان !!
أترك خطانا وأنـت عطنـا صوابـك

لااعرف ماذا اقول فانا عاجز تماما عن التعبير عن اعجابي بك وبكلماتك الرائعه في كل مره اجد بين طيات كلمات معاني حقيقه نسجت بعتناء تام انت فعلا مميز تقبل مروري المتواضع

يسلمووو على المرور الاجمل ومشكور على الردود الاكثر من روعه منور صفحتي بمرورك المميز منور والله